कावा प्रमुख आयुक्त बस्न्यातद्वारा कर्मचारीलाई निर्देशन

काठमाडौँ, ७ कात्तिक । अख्तियार दुरुपयोग अनुसन्धान आयोगका कार्यवाहक प्रमुख आयुक्त दीप बस्न्यातले आयोगका कर्मचारीलाई निष्ठापूर्वक कार्यसम्पादन गर्न निर्देशन दिनुभएको छ । प्रमुख आयुक्त लोकमानसिंह कार्कीमाथि महाअभियोग प्रस्ताव पेस भएपछिको परिवर्तित सन्दर्भमा आयोगका कर्मचारीलाई निर्देशन दिनुहुँदै उहाँले कर्मचारीले आयोगद्वारा निर्धारित आचरण र संवैधानिक कानुनको इमान्दारीपूर्वक पालना गर्नुपर्ने बताउनुभयो । आयोग नेतृत्वविरुद्धको महाअभियोग प्रस्तावले सिङ्गो आयोग परिवारलाई आहत तुल्याएको बताउँदै उहाँले आयोग जीवन्त संस्था भएको हुँदा निश्चित घटना विशेषका आधारमा आयोगलाई प्राप्त संवैधानिक दायित्व र कार्यसम्पादनको प्रभावकारितामा विचलन नआउने स्पष्ट पार्नुभयो । उहाँले भन्नुभयो, “आयोगमा कार्यरत प्रत्येक कर्मचारीले आफू संवेदनशील र महत्वपूर्ण निकायमा कार्यरत रहेको तथ्यबोध गर्दै आयोगको मर्यादा, प्रतिष्ठा र छविलाई उँचो तुल्याउने ढङ्गबाट कार्यसम्पादनलाई तीव्रता दिनुपर्छ ।” आयोगप्रतिको जनभरोसा, विश्वास र निष्ठालाई अझै सशक्त र सुदृढ तुल्याउन आयोग परिवार कटिबद्ध रहेको स्पष्ट पार्नुहुँदै कावा प्रमुख आयुक्त बस्न्यातले जनअपेक्षाको समूचित सम्बोधन नै आयोगको ध्येय र उद्देश्य रहेको बताउनुभयो । कार्यक्रममा आयुक्तहरु नवीनकुमार घिमिरे, डा गणेशराज जोशी, राजनारायण पाठक र डा सावित्री थापा गुरुङलगायत आयोगका कर्मचारी उपस्थित हुुनुहुथ्यो । 

रासस